Verið velkomin í Borgarholtsskóla

Nemendurnir ásamt Erni, Stínu Maju og Stínu Þóru

Listafólkið ásamt sviðstjóra og skólameisturum

Nemendur á þriðja og síðasta ári á listnámsbraut, grafískri hönnun, hafa nýlokið við að mála vegglistaverk í Glerbúrið, en það er aðstaða inn af matsal nemenda þar sem þau geta hvílt sig eða leikið sér á milli kennslustunda. Eftir að hafa velt verkefninu fyrir sér og rætt hugmyndir fram og til baka tóku nemendurnir þá ákvörðun að hafa fiskabúrs-þema og máluðu þau ýmsar verur sem hugsanlegt væri að finna í fiskabúri á veggina. Eins og meðfylgjandi myndir sýna er útkoman skemmtileg og ansi lífleg.
Verkið mun standa uppi í þrjú ár en hugmyndin er sú að þriðja árs nemar í grafíkinni fái alltaf tækifæri til að búa til vegglistaverk í skólanum sínum og hafa þrír veggir/rými verið tekin frá. Allir þekkja verkið sem er á vegg gasgeymslu skólans – Blómstrað í Borgó – en að auki hafa glerbúrið og gangur milli bíla- og málmskála verið tekin frá fyrir listafólkið.
Örn Tönsberg, vegglistamaður, veitti nemendum tilsögn ásamt kennurum þeirra í grafíkinni, þeim Raggý, Stínu Maju og Stínu Þóru. Í tilefni verklokanna var listafólkinu boðið til pítsuveislu.

Nemendur ásamt skólastjórnendum og kennurum 

Síðasta vika var nýnemavika í Borgarholtsskóla en hún hófst með því að nemendafélagið seldi snúða og mjólk í hádeginu á mánudag. Á mánudagskvöld var nýnemakvöld þar sem gefnar voru pizzur, farið var í hópleiki og nemendafélagið kynnti nefndir og ráð. Á þriðjudag var íþróttadagur en keppt var í borðtennis, foosball og körfubolta. 
Á miðvikudag voru grillaðar pylsur í hádeginu og reistur hoppukastali á skólalóðinni fyrir nemendur. Á miðvikudagkvöld var svo nýnemaball í Gamla bíó um kvöldið og var það í samvinnu við Fjölbrautaskólann í Breiðholti og Fjölbrautaskólann við Ármúla. Það fór allt vel fram og nemendur skemmtu sér konunglega. Nýnemavikan endaði svo á náttafatadegi á föstudegi.
Í vikunni fara fram nýnemaviðtöl þar sem nýnemar verða teknir inn í nefndir nemendafélagsins.
&nbsp;
&nbsp;

Elma Björns­dótt­ir, Sylvía Kar­en Ragn­ars­dótt­ir, Sól­rún Eva Hilm­ars­dótt­ir og Stefán Árni Stef­áns­son, nem­end­ur í bíla­mál­un

Jagúarinn bíður þess að verða málaður

Í Borgarholtsskóla hefur undanfarin misseri verið unnið að viðgerðum á Jagúar-bifreið Nóbelskáldsins okkar, Halldórs Kiljan Laxness. Verkið er unnið af nemendum skólans í bílamálun og bifreiðasmíði undir handleiðslu kennara. Nú er farið að hilla undir verklok og er áætlað að bíllinn verði afhentur safninu að Gljúfrasteini nú í vor.
Á dögunum var efnt til verkfundar við borðstofuborð skáldsins á Gljúfrasteini þar sem saman komu fulltrúar Borgarholtsskóla og safnsins auk starfsmanna Poulsen og B&amp;L, en þessi fyrirtæki hafa bæði komið að verkinu með myndarlegum hætti. Poulsen skaffar allt efni sem þarf til að mála bílinn og B&amp;L hafa gefið ýmsa varahluti sem á hefur þurft að halda og pantað þá beint frá Jagúar-verksmiðjunum á Bretlandi.
Eins og sjá má á meðfylgjandi myndum er enn nokkuð langt í land að Jagúarinn verði tilbúinn en áætlað er að ytra byrði verði málað á næstu tveimur vikum. Þá fara vél og gírkassi í yfirhalningu og á meðan verður vélarhúsið málað. Að því loknu verður bíllinn settur saman og afhentur safninu.

Jagúarhópurinn fundar á Gljúfrasteini 15. september 2023

Ráðherra breytir tvemur D-um í B - fyrir Borgó

Ásmundur Einar ræðir við Skarphéðinn deildarstjóra pípulagna, Ársæl skólameistara og Ástu Laufey aðstoðarskólameistara

Ásmundur Einar og Ársæll ásamt Þórunni Sveinbjörnsdóttur og Fanný Gunnarsdóttur sem sæti eiga í skólanefnd Borgó

„Þetta er fyrsta skrefið. Ég segi skref því inn í þessum áformum er að stækka Borgarholtsskóla. Við ætlum að hanna og greina það á næsta ári hvernig sú viðbygging á að vera og nota árið 2025 til að framkvæma,“ sagði Ásmundur Einar Daðason, mennta- og barnamálaráðherra, meðal annars í ræðu sinni þegar hann vígði nýja pípulagningadeild Borgarholtsskóla við Bæjarflöt í Grafarvogi.
Skólinn kallar deildina Skarpaskjól en Skarphéðinn Skarphéðinsson, deildarstjóri í pípulögnum, hefur haft veg og vanda af því að gera aðstöðuna klára á aðeins nokkrum mánuðum. Ásmundur benti á að deildin minnti lítið á hina hefðbundnu kennslustofu. Þetta væri sérhæft húsnæði fyrir kennsluna sem þarna færi fram, eitthvað sem honum hugnaðist vel.
„Það er ánægjulegt að sjá þetta fara af stað. Ég hef mikinn áhuga á eflingu starfsnáms og við ætlum að mæta þeirri eftirspurn sem er með aðgerðum,“ sagði hann og bætti við. „Hér er sérhæfð aðstaða. Þetta er ekki einföld kennslustofa eins og við þekkjum hana. En við verðum að geta mætt því fjárhagslega &#8211; ekki bara að byggja heldur líka eiga fjármagn til að mennta nemendur og skólinn fái það fjármagn sem þarf til þess,“ sagði ráðherra.
Ársæll Guðmundsson, skólameistari Borgarholtsskóla, tók einnig til máls og sagði að þau 30 ár sem hann hefði starfað innan skólakerfisins hefði hann barist lengi fyrir því að hugað sé að kennsluhúsnæðinu því allt of oft hefðu Íslendingar sett list-, verk- og starfsnám í húsnæði sem hannað væri til bóknáms.
„Allir birgjar og atvinnulífið hafa tekið okkur opnum örmum og styrkt skólann með miklum velvilja. Staðið við bakið á okkur sem erum að mennta fólk í iðngreinum. Það skiptir öllu máli,“ sagði Ársæll en atvinnulífið hefur stutt vel við bakið á pípulagningadeildinni í formi gjafa og velvildar.
Að því loknu fékk Ásmundur að spreyta sig á pípulögnum og klippti svo loks á pípulagningaborða með Framsóknargrænum klippum og vígði nýja deild skólans undir dynjandi lófataki gesta. Hann bætti við að hann væri sérstaklega ánægður með litinn á klippunum.

Ráðherra, skólameistari, deildarstjóri og nemendur klippa á "borðann"

Kennarar og skólameistari Borgó ásamt fulltrúum Tengis

Nemendur og starfsfólk Borgó ásamt fulltrúm Tengis

Enn berast pípulagnadeild Borgarholtsskóla góðar gjafir, að þessu sinni frá Tengi ehf. sem er gamalgróið fyrirtæki í pípulagnabransanum. Veitti skólameistari Ársæll Guðmundsson skólameistari gjöfunum viðtöku að viðstöddum fulltrúum Tengis, nemenda á pípulagnabraut og fleiri góðum gestum.
Um er að ræða svokallað „Quick and easy“ kerfi sem er það nýjasta í pípulögnum í dag. Kerfið samanstendur af rörum, tengiboxum og tengidósum og er það frábrugðið eldri lagnakerfum að því leiti að ídráttarrör eru sett í veggi og gólf fyrirfram og hinar eiginlegu vatnsleiðslur eru dregnar í á síðari stigum byggingarframkvæmda.
Það voru þeir Arnar Árnason og Björn Ágúst Björnsson sem afhentu gjöfina fyrir hönd Tengis ehf. en Ársæll og Skarphéðinn Skarphéðinsson, deildarstjóri pípulagnadeildar, veittu þeim viðtöku. Að lokum var gestum boðið upp á gómsætar snittur af bestu gerð og gafst þá tækifæri til spjalls.

Ársæll tekur við gjöfinni af hálfu Borgarholtsskóla

Starfsmenn Byko komu færandi hendi í heimsókn í pípulagnadeild Borgarholtsskóla á dögunum. Færðu þeir skólanum að gjöf upphengjanleg salerni og allan búnað sem þarf til að setja tækin upp og tengja. Einnig gaf fyrirtækið skólanum blöndunartæki og annan tengdan búnað.
Það voru þeir Árni Kvaran og Guðjón Grétar Daníelsson sem mættu fyrir hönd Byko og veittu Ársæll skólameistari og Skarphéðinn, deildarstjóri pípulagna, gjöfinni viðtöku. Ársæll ítrekaði fyrri orð sín um mikilvægi samstarfs og samvinnu atvinnulífs og skóla og minnti á að markmið beggja aðila væri að efla sem mest og best fagmennsku og vönduð vinnubrögð í iðngreininni.
Að lokum þáðu gestir snittur og kaffisopa í Skarpaskjóli, hinni nýju og glæsilegu aðstöðu skólans til kennslu í pípulögnum.

Fulltrúi Byko og skólameistari handsala gjöfina

Nemendur á fyrsta ári á listnámsbraut fóru 31. ágúst síðastliðinn á sýninguna<a href="https://listasafnreykjavikur.is/syningar/kviksja-islensk-myndlist-21-old" target="_blank" rel="noopener"> Kviksjá í Listasafni Reykjavíkur</a>. Á sýningunni Kviksjá: Íslensk myndlist á 21. öld  gefur að líta úrval af þeim verkum sem Listasafn Reykjavíkur hefur eignast síðustu tvo áratugi. Verkin gefa innsýn inn í þá breidd og þær áherslur sem hafa verið að mótast og gerjast í íslensku listalífi frá aldamótum 2000 til dagsins í dag.
Nemendur fengu leiðsögn um sýninguna og skemmtu sér vel við að skoða verkin.

Marín sviðstjóri iðn- og stafsnáms, Íris Rut, verkefnistjóri ferla og Magnea, fjármálastjóri

Íris og Philip frá Innréttingum og tækjum

Kennarar deildarinnar skoða innfelld blöndunartæki

Á dögunum afhenti starfsfólk <a href="https://jensenbjarnason.is/" target="_blank" rel="noopener">Innréttinga og tækja</a> pípulagnadeild skólans höfðinglega gjöf. Þau komu færandi hendi með handlaugar, eldhúsvaska, innbyggð salerni og blöndunartæki frá Fima Therm. Tekið var á móti gjöfinni að Bæjarflöt 19 þar sem innréttuð hefur verið glæsileg aðstaða til kennslu í pípulögnum. Innréttingum og tækjum er þakkað innilega rausnarlega gjöf. Samstarf skólans við atvinnulífið er mjög mikils virði og er að mati skólastjórnenda lykill að menntun ungs fólks til starfa í iðnaði.
Íris Jensen og Philip Grétarsson frá Innréttingum og tækjum afhentu búnaðinn en Ársæll Guðmundsson, skólameistari, veitti honum viðtöku fyrir hönd skólans ásamt Skarphéðni Skarphéðinssyni, deildarstjóra pípulagnadeildar.

Ársæll og Skarphéðinn taka við gjöfinni úr höndum Írisar og Philips

Bíltæknibrautir í Borgarholtsskóla fengu á dögunum vegleg gjöf frá <a href="https://www.rupes.com/">Rupes</a>. Gjöfin var tvær mössunarvélar sem munu nýtast vel í kennslu í bílamálun. Bjarni Hannes Kristjánsson, stundakennari í bílamálun og starfsmaður hjá Málningarvörum ehf., afhenti Marín Björk Jónasdóttur sviðsstjóra iðn- og starfsnáms og Ólafi Gunnari Péturssyni deildarstjóra bíltæknibrauta vélarnar.
Rupes er þakkað kærlega fyrir gjöfina.

Marín Björk, sviðsstjóri, Birgir Örn, kennari, Ólafur Gunnar, deildarstjóri og Bjarni Hannes, kennari. 

Hópur nemenda af listnámsbraut fór ásamt kennurum að sjá sýninguna Twisted forest föstudaginn 25. ágúst. Twisted forest er leiksýning eftir danska leikhópinn Wunderland. Sýningin byggist á þáttöku áhorfenda í verkinu. Það fór fram í Heiðmörk en ferðast var í gegnum skóginn í litlum hópum þar sem faldar voru allskonar upplifanir. Áhorfendur fengu sérstakan hlífðargalla og hljóðbúnað til að nota á meðan sýningu stóð.
Mikil ánægja var með ferðina og nemendur jafnt sem kennarar skemmtu sér vel.

Hópurinn sem fór á leiksýninguna Twisted forest 

Föstudaginn 18. ágúst var nýnemadagur. Þá mættu nýnemar í skólann, fengu kynningu á þjónustu sem er í boði í skólanum en auk þess hittu þau umsjónarkennara sína. Eftir það var þeim boðið upp á grillaðar pylsur en þaðan var haldið í Skemmtigarðinn í Gufunesi. Þetta er í annað skipti sem haldinn er sérstakur nýnemadagur en það hefur mælst mjög vel fyrir.
Dagurinn gekk vel í alla staði og þótti nýnemum gott að fá að kynnast innbyrðis áður en kennsla hófst.

Nú líður að því að skólahald hefjist aftur að nýju eftir sumarleyfi.
Nýnemadagur er 18. ágúst en þá mæta nýnemar í matsal skólans kl. 9:00. Dagskrá verður til kl. 15:00 og fá þau meðal annars kynningu á skólanum og hitta umsjónarkennara sína.
Kennsla á haustönn 2023 hefst mánudaginn 21. ágúst samkvæmt stundatöflu. Stundatöflur verða birtar miðvikudaginn 16. ágúst. Bókalista má einnig finna á <a href="https://inna.is/" target="_blank" rel="noopener">Innu</a>. 21. ágúst hefst einnig kennsla í kvöldskóla í málmi en 25. ágúst hefst kennsla í dreifnámi með fyrstu staðlotu annarinnar.
Töflubreytingar fyrir alla aðra en nýnema hefjast 16. ágúst. Aðrir nemendur en útskriftarefni senda inn beiðnir um töflubreytingar rafrænt í gegn um <a href="https://inna.is/">Innu </a>og verða þær afgreiddar svo fljótt sem auðið verður. <a href="https://wp.borgo.is/wp-content/uploads/toflubreytingar-2023.pdf" target="_blank" rel="noopener">Leiðbeiningar um rafrænar töflubreytingar</a>. 
Nemendur sem hyggja á útskrift á skólaárinu 2023-2024 geta fengið ráðgjöf vegna útskriftar hjá áfangastjóra, fóstru mætinga og umsjónar og sviðstjórum mánudaginn 21. ágúst
<a href="https://us05web.zoom.us/j/81900573447?pwd=s0GegSO7alP2iHt5YWlZa8j5MpEqWL.1" target="_blank" rel="noopener">Kynningarfundur fyrir dreifnámsnemendur á félagsvirkni- og uppeldissviði verður 16. ágúst kl. 17 á zoom</a>.
Kynning fyrir foreldra nýnema (fædd 2007 eða síðar) verður í matsal skólans kl. 17:00 þann 17. ágúst.
Hægt er að fylgjast með lífinu í skólanum á <a href="https://www.instagram.com/borgo_skoli/" target="_blank" rel="noopener">instagramsíðum skólans</a> og  <a href="https://www.instagram.com/nfbhs/" target="_blank" rel="noopener">nemendafélagsins </a>.

Skólahald hefst að nýju eftir sumarleyfi

Ásmundur Einar og Einar í verknámshúsi

Mánudaginn 12. júní komu Ásmundur Einar Daðason mennta- og barnamálaráðherra, Einar Þorsteinsson borgarfulltrúi, Fanný Gunnarsdóttir formaður skólanefndar og Teitur Erlingsson aðstoðarmaður ráðherra  í heimsókn í Borgarholtsskóla.
Spjallað var um stöðu iðn- og starfsnáms og húsnæðisþörf skólans sem hefur aukist verulega eftir að kennsla var tekin upp í pípulögnum. Einnig var rætt um húsnæðisþörf listnáms en enn þarf að bæta verulega aðstöðu vegna kennslu í kvikmyndagerð og leiklist. Bygging nýs skála mun leysa þann vanda en undirbúningur og framkvæmdir hefjast væntanlega á næstu misserum. Skólameistari kynnti hugmyndir sem komnar eru fram varðandi reit 93 sem staðsettur er norðan megin við bílastæði skólans. Í hugmyndunum fellst meðal annars að komið verði á samstarfi milli skólans og heilbrigðisyfirvalda með það að markmiði að samþætta starfsemina og brúa þannig kynslóðabilið.
Að fundi loknum gengu skólameistarar með gestunum um húsnæði skólans og kynntust þeir aðstöðunni sem skólastarfinu er búin.

Ásmundur Einar Daðason og Einar Þorsteinsson ásamt skólameisturum Borgarholtsskóla

Föstudaginn 9. júní 2023 var samstarfssamningur Hringsjár náms- og starfsendurhæfingar, Borgarholtsskóla, Fjölbrautarskólans við Ármúla, Fjölbrautarskólans í Breiðholti og Tækniskólans undirritaður í húsnæði Hringsjár.
Undir samstarfssamninginn rituðu Ársæll Guðmundsson skólameistari Borgarholtsskóla, Magnús Ingvason skólameistari Fjölbrautarskólans við Ármúla, Guðrún Hrefna Guðmundsdóttir skólameistari Fjölbrautarskólans í Breiðholti og Hildur Ingvarsdóttir skólameistari Tækniskólans. Fyrir hönd Hringsjár voru Þuríður Harpa Sigurðardóttir formaður ÖBÍ réttindasamtaka, Elfa S. Hermannsdóttir fyrir hönd stjórnar og Helga Eysteinsdóttir forstöðumaður.
Hringsjá náms- og starfsendurhæfing hefur verið starfandi frá árinu 1987 og er í eigu ÖBÍ réttindasamtaka. Hringsjá hefur verið í miklu samstarfi við áður talda framhaldsskóla en með formlegum samstarfsamningi verður nám Hringsjár metið til framhaldsskólaeininga. Þetta samkomulag hefur mikla þýðingu fyrir starfsemi og nemendur Hringsjár sem fá með þessu móti aukin tækifæri til frekara náms.
&nbsp;
&nbsp;

Föstudaginn 26. maí var afhentur landsliðsstyrkur Borgarholtsskóla. Fjórir nemendur hlutu styrk að þessu sinni fyrir landsliðsverkefni á vorönn 2023.
Styrkhafar eru: 
Auður Bergrún Snorradóttir hlaut styrk fyrir æfingaferð með landsliðinu í golfi á Spáni í janúar. 
Skarphéðinn Hjaltason hlaut styrk fyrir æfingabúðir með landsliðinu í júdó í Tékklandi í mars og Norðurlandamót í fullorðinsflokki og U-21 í Noregi í maí. 
Elísa Dís Sigfinnsdóttir hlaut styrk fyrir HM kvenna í íshokkí í Mexíkó. 
Gunnlaugur Þorsteinsson hlaut styrk fyrir HM karla í íshokkí á Spáni.
Meðfylgjandi mynd var tekin þegar styrkurinn var afhentur en Auður Bergrún gat því miður ekki verið viðstödd.
Styrkhöfum er óskað innilega til hamingju með styrkinn.

Styrkhafar ásamt Arnóri Ásgeirssyni, deildarstjóra afrekssviðs.

Fyrir skömmu þreyttu fjórir nemendur alþjóðlegt þýskupróf á A2 stigi. Þetta próf er hluti af samstarfi skólans og Goethe Institut í Kaupmannahöfn. Nemendur stóðu sig með prýði en Ásta Laufey Aðalsteinsdóttir aðstoðarskólameistari afhenti þeim skírteini fyrir prófin.
Á myndinni eru þær Eyrún Ingadóttir, Greta Poskute og Jónína Halla Jónsdóttir. Fjórði nemandinn, Óttar Bergmann Ólafsson, gat því miður ekki verið viðstaddur.
Gaman er að segja frá því að Greta Poskute fékk verðlaun í hinni árlegu þýskuþraut sem er boð um þátttöku í Eurocamp í Sachsen-Anhalt, Þýskalandi.
Þeim Eyrúnu, Gretu, Jónínu og Óttari er óskað innilega til hamingju með árangurinn.

Nemendur með skírteinin sín ásamt Ástu Laufeyju, aðstoðarskólameistara og þýskukennurum skólans, Bernd og Sigurborgu. 

Skólameistarar fara fyrir hópi útskriftarnema

Ásta Laufey Aðalsteinsdóttir aðstoðarskólameistari

Fjölmargir nemendur fengu viðurkenningu fyrir góðan árangur og ástundun

Jónína Halla Jónsdóttir fékk mörg verðlaun og var með hæstu einkunn á stúdentsprófi

Júlía Margrét Jónsdóttir flutti ávarp nýstúdenta

Sigurjón Geirsson Arnarson flutti ávarp 10 ára útskriftarnema

Eva Rún Michelsen flutti ávarp 20 ára útskriftarnema

Sönghópur Borgarholtsskóla flutti tvö lög

Skólahljómsveit Mosfellsbæjar lék fyrir athöfnina

Nemendur sem útskrifuðust af afreksíþróttasviði ásamt Arnóri Ásgeirssyni verkefnisstjóra

Sumir voru með hvítar og rauðar húfur

Og enn aðrir með grænar þó ekki hafi verið búið að setja þær upp þarna

Guðlaug María Bjarnadóttir, Guðrún Ragnarsdóttir og Sigurborg Jónsdóttir láta allar af störfum sökum aldurs og var þeim færður þakklætisvottur

Brautskráning Borgarholtsskóla fór fram í Háskólabíói fimmtudaginn 25. maí 2023. Athöfninni var auk þess streymt á facebook síðu skólans af nemendum í kvikmyndagerð undir stjórn Þorgeirs Guðmundssonar kennara.  Að þessu sinni voru brautskráðir 159 nemendur af öllum brautum skólans. Fyrir athöfnina spilaði Skólahljómsveit Mosfellsbæjar undir stjórn Daða Þórs Einarssonar en hljómsveitin hefur spilað í öllum útskriftarathöfnum frá stofnun skólans og var stjórnandanum færður smá þakklætisvottur.
Ársæll Guðmundsson skólameistari setti athöfnina og Ásta Laufey Aðalsteinsdóttir aðstoðarskólameistari fór yfir það helsta sem gerðist á önninni í skólastarfinu.
Sönghópur Borgarholtsskóla fluttu tvö tónlistaratriði undir stjórn Guðbjargar Hilmarsdóttur kennara. Fyrra lagið sem þau fluttu var Fallegur dagur, lag og ljóð Bubba Morthens. Síðara lagið var flutt í lok athafnar en það var Vikivaki, lag Valgeirs Guðjónssonar við texta Jóhannesar úr Kötlum.
Skólameistarar brautskráðu nemendur og nutu við það aðstoðar sviðsstjóra. Fjölbreytt námsframboð er í Borgarholtsskóla og endurspeglaði útskriftarhópurinn þennan fjölbreytileika.
Fjölmargir nemendur hlutu viðurkenningu fyrir frábæran námsárangur og ástundun en skólinn á marga velunnara sem eru örlátir þegar kemur að því að gefa gjafir. Meðal þeirra sem veittu að þessu sinni voru Bílanaust, Bílgreinasambandið, Fossberg, Gastech, Héðinn &#8211; vélsmiðja, Háskóli Íslands, Hreysti, Iðan -fræðslusetur, Jak, Kemi/Paulsen, Klif, Landvélar, Málningarvörur, NaustMarine, New Wave Iceland, Röggi, Sindri, Stilling og síðast en ekki síst, danska sendiráðið og þýska sendiráðið.
Ávarp útskriftarnema flutti Júlía Margrét Jónsdóttir sem útskrifaðist af listnámsbraut með leiklist sem kjörsvið. Ávarp 10 ára útskriftarnema flutti Sigurjón Geirsson Arnarson sem útskrifaðist úr bílamálun en er nú starfandi kennari við skólann. Ávarp 20 ára útskriftarnema flutti Eva Rún Michelsen.
Ársæll Guðmundsson flutti kveðjuorð til nemenda og lagði hann út frá jákvæðri sálfræði en samkvæmt henni eru nokkur atriði sem eru mikilvæg fyrir þau sem vilja öðlast hamingju. Rannsóknir hafa sýnt að trú lyftir andanum og skapar von gagnvart framtíðinni. Vinátta, sterk tengsl við fjölskyldu og öflugt félagslegt tengslanet eru allt mikilvægir þættir í hamingjuleitinni. Ársæll hvatti til þess að njóta líðandi stundar, lifa í núinu og helga sig þeim verkefnum sem þarf að leysa með gleði, áhuga og opnum huga. Allir búa yfir styrkleika og hver og einn þarf að gefa sér tíma til að finna og þróa eigin styrkleika og nota þá svo til góðra verka. Ársæll benti á að með réttu og léttu hugarfari væri auðveldara að höndla hamingjuna. Hann hvatti nemendur til að iðka hugleiðslu, gera öðrum gott og trúa á eitthvað fallegt og þá myndi hugurinn lýsast.
Þrír kennarar láta af störfum sökum aldurs þetta vorið en það eru Sigurborg Jónsdóttir, þýskukennari sem hóf störf við skólann 2002, Guðrún Ragnarsdóttir, kennari í listnámi sem hóf störf við skólann árið 2002 og Guðlaug María Bjarnadóttir leiklistarkennari sem hóf störf við skólann árið 2001. Þessum kennurum var þakkað kærlega fyrir störf í þágu nemenda og samstarfsfólks og var þeim færður þakklætisvottur.
Ársæll þakkaði velunnurum skólans og starfsfólki öllu fyrir ánægjulegt samstarf á skólaárinu. Að lokum þakkaði hann útskriftarnemendum fyrir þeirra skerf til skólans og minnti á að enginn skóli er betri en nemendurnir sem í honum eru og hvernig þeir  bera honum vitni þegar fram líða stundir.
Útskriftarnemum öllum er óskað innilega til hamingju með áfangann.

Hópur nemenda úr kór Borgaholtsskóla tók í vikunni á móti hópi af nemendum frá Nordhorn í Þýskalandi. Sönghópurinn frá Borgarholtsskóla fór í heimsókn til Norhorn fyrir tæpum tveimur mánuðum og var nú komið að því að endurgjalda gestrisnina og taka á móti þýsku nemendunum. Þessi samvinna er hluti af erlendu samstarfi skólans og er styrkt af Erasmus+.
Sameiginlegur sönghópur íslenskra og þýskra nemenda héldu tvenna tónleika 10. maí. Haldnir voru tónleikar í Borgum og svo í Hörpuhorni í Hörpunni. Þema tónleikanna var kvikmyndatónlist. Tónleikarnir voru báðir mjög vel heppnaðir og mikil ánægja meðal gesta.

Þriðjudaginn 9. maí frumsýndu þriðja árs nemar á leiklistarkjörsviði sýninguna Poppkorn. Sýningin er lokaverkefni þeirra í leiklist en þrjár sýningar voru á dagskrá, auk frumsýningar var sýning miðvikudaginn 10. maí og síðasta sýningin er í kvöld, fimmtudaginn 11. maí. Níu nemendur léku hlutverk í sýningunni undir stjórn Guðnýjar Maríu Jónsdóttur (leiktúlkun), Guðmundar Elíasar Knudsen (sviðshreyfingar), Guðbjargar Hilmarsdóttur (raddbeiting) og Evu Bjargar Harðardóttur (leikmynd og búningar). Námstími útskriftarhópsins hefur verið krefjandi á margan hátt með heimsfaraldri, takmörkunum á nálægð og grímuskyldu.
Verkið er byggt á bók sem kom út 1996 en það var leikgert sama ár, frumsýnt í leikhúsi í Nottingham og loks sett upp á West End. Í leikritinu veltir höfundur fyrir sér ábyrgð listafólks og hvaða áhrif listaverk hafi á tíðaranda og samfélag.
Nemendur stóðu sig frábærlega og er nemendum jafnt sem kennurum óskað til hamingju með sýninguna.
&nbsp;

Nýsveinahátíð Iðnaðarmannafélags Reykjavíkur fór fram í febrúar síðastliðnum. Þar eru veitt silfur- og bronsverðlaun til nema sem þykja hafa skarað fram úr í sveinsprófi sínu. Nýsveinum, meisturum þeirra, fjölskyldu og vinum er boðið á hátíðina. Forseti Íslands, sem er jafnframt verndari hátíðarinnar, veitti 26 nýsveinum  silfur- og bronsverðlaun. Var nýsveinum afhent viðurkenningarskjöl auk verðlaunapeninga og gjafa frá félaginu.
Einn nemandi frá Borgarholtsskóla hlaut verðlaun á hátíðinni. Það var Hákon Vignir Smárason sem fékk silfurverðlaun fyrir árangur í rennismíði. Hákoni er óskað kærlega til hamingju með verðlaunin.
Meðfylgjandi mynd er tekin við þetta tilefni og er <a href="https://www.imfr.is/is/myndaalbum/nysveinahatid-2023">fengin frá IMFR.</a>

Hákon Vignir ásamt Forseta Íslands, meistara sínum og fulltrúa Iðnaðarmannafélags Reykjavíkur (Mynd frá IMFR)

VERTU STÁLSLEGIN  er kynningarátak sem allir iðn- og verkmenntaskólar, þar sem málmiðngreinar eru í boði, standa saman að. Markmiðið er að vekja athygli á þeim fjölbreyttu tækifærum sem nám í málmiðngreinum hefur upp á að bjóða. Hvort sem stefnan er sett á krefjandi háskólanám eða frama í atvinnulífinu, þá eru námsgreinar eins og stálsmíði, rennismíði og vélvirkjun, vandað nám sem gefur nemendum góða innsýn í heim málmiðnaðarins.
Tinna María &#8211; sem er nemandi í vélvirkjun hjá Borgó – sem tekur þátt í átakinu segir:
„Ef ég tala fyrir sjálfa mig þá er ég mjög ánægð með að ég valdi þetta nám ef þú ert í grunnskólanámi og ert að hugsa um framhaldsskólanám endilega hlusta á hjartað velja það sem þig langar og stökkva út í djúpu laugina.“

Á dögunum fór fram lokahóf og úrslit Ungra Frumkvöðla. Tveir hópar frá Borgarholtsskóla komust í úrslit en það voru Dúma sem framleiddu legghlífar úr korki og Plastcase sem endurnýtt heybaggaplast í símahulstur.  Báðir hópar voru til fyrirmyndar og voru 2 af 30 liðum sem komust áfram en 700 nemendur úr 15 framhaldsskólum taka þátt. Í efstu þremur sætunum urðu lið frá Verzlunarskóla Íslands. Plastcase hlaut verðlaun fyrir umhverfisvænustu lausnina.
Dúma og Plastcase hópunum er óskað innilega til hamingju með árangurinn og Plastcase sérstaklega fyrir umhverfisvænustu lausnina.
&nbsp;

Laugardaginn 6. maí fór fram sýning á lokaverkefnum nemenda í kvikmyndagerð í Bíó Paradís. Þar sýndu nemendur á kvikmyndakjörsviði stuttmyndir sem þau hafa unnið að á önninni undir stjórn Þiðriks Christians Emilssonar, Þorgeirs Guðmundssonar, Hákons Más Oddsonar og Curvers Thoroddsen, kennara í kvikmyndagerð.
Eftirfarandi myndir voru sýndar: 
Afi eftir Ignacio Gabriel G. Guðjónsson 
Að mála fyrir mann eftir Óskar Nikulás Sveinbjarnarson 
Hún eftir Andra Jón Egilsson 
The Activist eftir Sayed Wahab Hashimi 
Blóðug örlög eftir Gunnar Má Björgvinsson 
Hinn smurði eftir Gabríel Má Geirsson 
Hel eftir Odd Auðunsson 
Óminni eftir Aron Daða Arnkelsson 
Kertaljós eftir Adriönnu Musial 
Móðir móðir eftir Jun Gunnar Lee Egilsson 
Breiðholtið eftir Magnús Sigurð Jónsson 
Íbúð 302 eftir Adam Emil Ríkarðsson
Mikil ánægja var með sýninguna og nemendum er óskað til hamingju með frábær lokaverkefni.

Kátir nemendur fyrir utan Bíó Paradís

Föstudaginn 5. maí fögnuðu væntanlegir útskriftarnemar í Borgarholtsskóla því að senn líður að lokum framhaldskólagöngu þeirra. Að venju klæddust nemendur ýmsum litríkum búningum eins og sjá má á meðfylgjandi myndum.
Dagurinn hófst með því að nemendum var boðið upp á gómsætan morgunverð ásamt starfsfólki skólans. Þegar fólk hafði matast færðist leikurinn fram í sal þar sem nemendur veittu viðurkenningar starfsfólki og kennurum sem þeim þóttu hafa skarað fram úr á önninni.
Að þessu loknu var ferðinni er heitið í miðbæ Reykjavíkur þar sem meðal annars verður farið í ratleik.

Nemendur í mörkun, GRH2B05, hafa unnið að verkefnum sem snúa að hugmyndum um skólann og skólaumhverfið. Var verkefnið unnið undir stjórn Ragnhildar Ragnarsdóttur, kennara á listnámsbraut. Nemendur voru með kynningu á verkefnum sínum fimmtudaginn 4. maí. Þar kynntu þau ýmsar tillögur og hugmyndir sem þau höfðu unnið um bætt skólaumhverfi. Meðal þeirra hugmynda sem fram komu voru að gert yrði kort til að hjálpa fólki að rata betur um skólann, ný uppsetningu á matsalnum og að gerður yrði fáni til að auðkenna skólann.
Kynningar nemenda voru vandaðar og margar flottar og athyglisverðar hugmyndir komu fram.

Nemendur ásamt kennurum og skólastjórnendum

Útskriftarnemendur í grafískri hönnun hafa undanfarnar vikur unnið af kappi að lokaverkefnum sínum undir styrkri stjórn Kristínar Maríu Ingimarsdóttur, Kristínar Þóru Guðbjartsdóttur og Ragnhildar Ragnarsdóttur kennara. Sýning með verkum nemendanna var opnuð formlega fimmtudaginn 4. maí  í Borgarbókasafni, menningarhúsi Spöng.
Eftirtaldir nemendur eiga verk á sýningunni: 
Andri Haukur Vilhelmsson 
Ari Jakobsson 
Arthúr Rós Saifa Pálsson 
Árni Björn Þórisson 
Felix Gústafsson 
Finnbjörn Helgi Guðjónsson 
Ína S. Stefánsdóttir 
Ladylene Ýr Atladóttir 
Regína Lind Magnúsdóttir
&nbsp;
Nemendunum og kennurum er óskað innilega til hamingju með glæsilega sýningu.
Sýningin stendur til 19. maí og eru allir hvattir til að koma við á bókasafninu í Spönginni og líta á þessi flottu listaverk.

Útskriftarhópurinn við opnun sýningarinnar

Á dögunum fór fram þýskuþraut og stuttmyndakeppni á vegum þýska sendiráðsins, þýskukennarafélagsins og Goethe Institut í Kaupmannahöfn. Þýskunemendur frá Borgarholtsskóla tóku þátt ásamt um 130 nemendum úr ýmsum skólum. Tveir nemendur Borgarholtsskóla voru í hópi 10 efstu þátttakenda en Greta Poskute varð í 5. sæti og Eyrún Ingadóttir í 8. sæti.
Gretu og Eyrúnu er óskað til hamingju með frábæran árangur.

Hið árlega skólablað nemenda í áfanganum ENS 3C05 er komið út í takmörkuðu upplagi. Þar má finna margar greinar um skóreglu skólans, enda heitir blaðið First They Took Our Shoes &#8211; Next They&#8217;ll Take Our Socks. Í blaðinu eru viðtöl við nemendur og starfsfólk skólans. Þar má finna lofgreinar um Borgó, Jón Finn og aðra kennara og Liverpool sem og lastgreinar um dökkar hliðar mannlegs eðlis.
Blaðið liggur frammi á göngum skólans og er fólk hvatt til að ná sér í eintak til aflestrar.

Dr. Helgi Gunnlaugsson, afbrotafræðingur og prófessor við Háskóla Íslands, kom í heimsókn föstudaginn 21. mars og flutti fyrirlestur fyrir nemendur í áfanganum FÉL3F05. Viðfangsefni Helga voru netglæpir á Íslandi en nemendur voru mjög áhugasamir um efni fyrirlestrarins. Magnús Einarsson kennir þennan félagsfræðiáfanga en í honum eru kynntar helstu kenningar, sjónarhorn og viðfangsefni afbrotafræðinnar, eða á því sviði sem kallast félagsfræði frávika.
Dr. Helga Gunnlaugssyni er þakkað kærlega fyrir komuna og áhugaverðan fyrirlestur.

Apollo (leikfélag Borgarholtsskóla) mun frumsýna Sexý sveit eftir Marc Camoletti í næstu viku. Leikstjórn er í höndum Kristins Óla S. Haraldssonar (Króli).
Leikritið Sexý sveit er gamanleikja-farsi þar sem öllum klisjum er gert hátt undir höfði. Auðmaðurinn Benedikt reynir hvað hann getur að hylma yfir framhjáhald sitt á meðan Þórunn, konan hans, gerir slíkt hið sama. Það gengur vægast sagt illa hjá þeim báðum.
Frumsýning er í salnum í Breiðholtsskóla föstudaginn 28. apríl en önnur og þriðja sýning eru 29. og 30. apríl. Sýningarnar hefjast klukkan 19:00 og <a href="https://tix.is/is/event/15278/sexy-sveit/?fbclid=PAAaZSI2mP200QvvLV090uwxSsqxZFJ08fOUJ9cKNYGCW7InoMZ81rL1ECS4A">miðasala fer fram á Tix.is.</a>
Rétt er að taka fram að sýningin er ekki ætluð börnum.
&nbsp;

Nemendur í lokaáfanga aflvélavirkjunar hafa verið duglegir að fara í vettvangsferðir í fyrirtæki sem tengist námi þeirra. Fyrir páska var farið í Stálsmiðjuna/Framtak og verkstæði þeirra skoðað. Framtak er stórt fyrirtæki sem sér um að viðhalda stærri hlutum líkt og skipavélum og búnaði fyrir verksmiðjur.
Þann 13. apríl var farið í heimsókn í Klett. Klettur er umboðsaðili fyrir Caterpillar og Scania á Íslandi ásamt því að selja hjólbarða.
Fyrirtækjunum sem heimsótt hafa verið er þakkað kærlega fyrir góðar móttökur og kynninguna á starfsemi sinni.
&nbsp;

Fimmtudaginn 30.3.2023 var dregið úr happdrættinu sem Borgarholtsskóli efndi til í tengslum við Mína framtíð í Laugardalshöll og opna húsið.
Nemendur sem spjölluðu við Borgó fólk í Laugardalshöll á dögunum fengu happdrættismiða sem þau gátu svo skilað í opna húsinu sem haldið var í Borgó vikuna á eftir og þannig komist í pottinn sem dregið var úr í dag.
Vinningshafarnir eru:
<ol>
<li>María Kristín Ólafsdóttir &#8211; tölva</li>
<li>Aron Barði Sigurðsson – fyrsta önn frí ef Borgó er valinn</li>
<li>Vincent Gunnsteinsson – fyrsta önn frí ef Borgó er valinn</li>
<li>Andrea Ósk Halldórsdóttir – fyrsta önn frí ef Borgó er valinn</li>
<li>Birna Rán Grétarsdóttir – fyrsta önn frí ef Borgó er valinn</li>
<li>Sara Ósk Benediktsdóttir – brúsi í poka</li>
<li>Hafdís Lilja Jónsdóttir – brúsi í poka</li>
<li>Sofia Amira Louzir – brúsi í poka</li>
<li>Esjar Smári Blær Gunnarsson – brúsi í poka</li>
<li>Finnbjörn Ingimundarson – brúsi í poka</li>
</ol>
Vinningshöfunum er óskað innilega til hamingju með vinninga en þau geta sótt þá á skrifstofu Borgó á opnunartíma.

Vikuna 25. mars til 1. apríl davldi hópur nemenda ásamt þýskukennurum skólans í Búdapest í Ungverjalandi. Ferðin var styrkt af Erasmus+ og er hluti af erlendu samstarfi skólans.
Tilgangur ferðarinnar var að heimsækja Szabo Lörinc skólann. Hópur nemenda og kennara frá skólanum komu í heimsókn í Borgarholtsskóla síðasta haust og kynntust starfinu. Vel var tekið á móti nemendum og kennurum Borgarholtsskóla í Szabo Lörinc. Þau heimsóttu þýskutíma á mismunandi stigum og spreyttu sig á ýmsum verkefnum þar. Auk þess fóru þau til dæmis í verklega kennslu í tortillagerð á spænsku. Nemendur beggja skóla náðu vel saman og skólaheimsóknin vel heppnuð. Auk þess að skoða skólann kynntust nemendur og kennarar þessari fallegu borg á bökkum Dónár. Þau skoðuðu ýmis kennileiti, fóru á söfn og eyddu dagstund við Balaton vatn.
Mikil ánægja var með ferðina bæði hjá nemendum og kennurum og er Szabo Lörinc skólanum þakkað kærlega fyrir góðar móttökur.
&nbsp;

Hópur nemenda úr kór Borgarholtsskóla hélt til Nordhorn, Þýskalands vikuna 12 – 18. mars. Guðbjörg Hilmarsdóttir og Flosi Jón Ófeigsson, kennarar á listnámsbraut, fóru fyrir hópnum. Ferðin var styrkt af Erasmus+ og hluti af erlendu samstarfi skólans.
Þema ferðarinnar var Music Connects og höfðu nemendur undirbúið sönglög úr ýmsum kvikmyndum. Móttökuaðili var skólinn Gymnasium Nordhorn og voru 12 nemendur úr kór skólans einnig þátttakendur í verkefninu. Bæði íslensku og þýsku nemendurnir æfðu sömu lög til að syngja saman. Þýsk-íslenski sönghópurinn kom fram á fimm tónleikum &#8211; þar á meðal á Charity Gala á vegum skólans. 
Mikil ánægja var með móttökur og skipulag verkefnisins og vonast er til að samstarfið haldi áfram.

Þriðjudaginn 21. mars var opið hús í Borgarholtsskóla þar sem starfsfólk og nemendur kynntu hið fjölbreytta nám sem í boði er í skólanum, félagslíf hans og skólabrag. Var nemendum sem útskrifast úr grunnskóla í vor sérstaklega boðið ásamt forráðafólki sínu.
Nemendur skólans fylgdu gestum í hópum um skólahúsnæðið þar sem aðstaðan var sýnd og fjölmörgum spurningum svarað. Gestir komu víða við og fengu tækifæri til að ræða við nemendur og kennara um nám og kennslu á hinum ýmsu brautum skólans.
Nemendur og forráðafólk staldraði einnig við í matsalnum þar sem kennarar, fagstjórar og nemendur voru til taks til að ræða hvað eina sem tengist námi við skólann. Kór Borgarholtsskóla söng einnig fyrir gesti í matsalnum.
Fjölmargir lögðu leið sína í skólann og er óhætt að segja að skólahúsnæðið hafi iðaði af lífi.

Á dögunum var samskiptasól Borgarholtsskóla sett upp á veggi á þremur stöðum í skólanum. Samskiptasólin er hönnun Kristínar Maríu Ingimarsdóttur, sem er grafískur hönnuður og kennari á listnámsbraut. Orðin sem fylla sólina voru ákveðin af öllu starfsfólki skólans á starfsdögum vorið 2022 en þau vísa til lykilatriða sem ætti að hafa huga þegar fólk á í samskiptum, hvort sem það er við samstarfsfólk eða nemendur.
Þetta er glæsileg hönnun hjá Kristínu Maríu og er henni þakkað kærlega fyrir. Þessi orð eru góð áminning fyrir alla sem ganga um skólann.
&nbsp;
&nbsp;

Fimmtudaginn 13. mars var afhentur landsliðsstyrkur fyrir haustönn 2022. Þrír nemendur hlutu styrk að þessu sinni:
<ul>
<li>Elísa Dís Sigfinnsdóttir sem keppir í íshokkí. Hún fór á fjögurra þjóða mót í Póllandi ásamt u18 landsliði Íslands í íshokkí í nóvember síðastliðnum.</li>
<li>Skarphéðinn Hjaltason sem keppir í júdó. Hann fór í æfingabúðir í Tékklandi, Svíþjóð og Finnlandi með A-landsliði. Hann keppti einnig á European Youth Olympic festival (u19) og Smáþjóðaleikunum í júdó í Lúxemburg með A-landsliðinu.</li>
<li>Gunnlaugur Þorsteinsson sem keppir í íshokkí. Hann fór í landsliðsferð til Serbíu með u20 landsliðinu í íshokkí.</li>
</ul>
<div title="Gunnlaugur þorateinsson">Þessum nemendum er óskað kærlega til hamingju en meðfylgjandi mynd var tekin þegar Arnór Ásgeirsson, verkefnastjóri afrekssviðs, afhenti þeim styrkinn.</div>

Viðburðurinn <a href="https://namogstorf.is/minframtid/min-framtid-2023/" target="_blank" rel="noopener">Mín framtíð </a> fór fram dagana 16.-18. mars í Laugardalshöll í samvinnu við mennta- og barnamálaráðuneytið, sveitarfélög og fagfélög iðn- og starfsgreina. Þar voru 30 framhaldsskólar kynntir ásamt því að <a href="https://verkidn.is/" target="_blank" rel="noopener">Verkiðn</a> stóð fyrir  Íslandsmóti iðn- og verkgreina. Keppt var í 22 fagreinum þar sem keppendur tókust á við krefjandi og raunveruleg verkefni í samkeppni.
Keppendur frá Borgarholtsskóla tóku þátt í þremur greinum, bifreiðasmíði, bílamálun og málmssuðu. Nokkur hópur tók þátt í bifreiðasmíði og bílamálun en Tinna María Stefnisdóttir var ein Borghyltinga sem tók þátt í keppni í málmssuðu. Í bifreiðasmíði varð Sólborg Birta Steinbergsdóttir hlutskörpust en í bílamálun var það Sara Gígja Geirsdóttir. Þeim er óskað innilega til hamingju með sigurinn í sinni grein.
Á sýningunni mátti sjá fjölbreytni og grósku í íslenskum framhaldsskólum. Sýningin gekk mjög vel og var vel sótt af tilvonandi framhaldsskólanemum svo og almenningi.

Fimmtudaginn 16. mars fór fram verðlaunaafhending í stærðfræðikeppni grunnskólanema sem haldin var í Borgarholtsskóla á dögunum. Íris Elfa Sigurðardóttir, kennari í stærðfræði, sá um framkvæmd keppninnar.
Að þessu sinni tóku 134 nemendur úr þremur árgöngum úr 11 skólum þátt. Nemendur í 8. bekk voru 63, nemendur í 9. bekk voru 38 og nemendur í 10. bekk voru 33.
Veitt voru verðlaun og viðurkenningar fyrir 10 efstu sætin í hverjum bekk. Í verðlaun voru heyrnatól frá Opnum kerfum, reiknivélar frá Heimilstækjum, páskaegg, gjafabréf frá Dominos eða Búllunni auk þess fengu nemendur í 1.-5 sæti í 10. bekk fría önn í Borgarholtsskóla.
Verðlaunahafar úr 8. bekk
1.-2. Einar Helgi Dóruson, Árbæjarskóla 
1.-2. Svana Marie Eiríksdóttir, Lágafellsskóla 
3. Hersir Jón Haraldsson, Ingunnarskóla 
4. Helena Guðjohnsen Elísdóttir, Foldaskóla 
5. Jasmín Tara Baxter, Seljaskóla 
6. Baldur Örn Mortensen, Ingunnarskóla 
7. Daníel Freyr Hjörvarsson, Lágafellsskóla 
8. Margrét Játvarðsdóttir, Sæmundarskóla 
9.-10.    Ragnheiður Gróa Elvarsdóttir, Árbæjarskóla 
9.-10.    Júlía Rós Kristinsdóttir, Lágafellsskóla
Verðlaunahafar úr 9. bekk
1. Snædís Jökulsdóttir, Árbæjarskóla 
2. Axel Björvinsson, Kvíslarskóla 
3. Rúben Leó Ingólfsson, Fellaskóla 
4.-5. Jakub Kobiela, Fellaskóla 
4.-5. Sara María Ingólfsdóttir, Lágafellsskóla 
6. Embla Maren Gunnarsdóttir, Lágafellsskóla 
7. Árni Benediktsson, Ölduselsskóla 
8. Ólafur Haukur Sævarsson, Lágafellsskóla 
9. Emma Sif Brynjarsdóttir, Sæmundarskóla 
10. Einar Tryggvi Petersen, Árbæjarskóla
Verðlaunahafar úr 10. bekk
1. Sölvi Hrannar Jóhannesson, Víkurskóla 
2. Aron Frosti Davíðsson, Kvíslarskóla 
3. Ásta Kristbjörnsdóttir, Kvíslarskóla 
4. Hekla Sóley Sigurðardóttir, Foldaskóla 
5. Haukur Logi Arnarsson, Lágafellsskóla 
6.-7. Hallsteinn Skorri Haraldsson, Ingunnarskóla 
6.-7. Viktor Axel Matthíasson, Seljaskóla 
8. Karen Hanna Vestmann Ágústsdóttir, Kvíslarskóla 
9. Bergur Davíð Eiríksson, Lágafellsskóla 
10. Aþena Rán Stefánsdóttir, Kvíslarskóla
Öllum þátttakendunum er þakkað fyrir þátttökuna og verðlaunahöfum óskað til hamingju.

Bóknámsbrautir Borgó fengu góða heimsókn frá Lettlandi og Litháen á dögunum. Þar voru á ferðinni nemendur ásamt kennurum og var heimsóknin liður í verkefninu „Think green, act green“ sem styrkt er af Nordplus áætluninni. Anton Már Gylfason, Kristján Ari Arason og Óttar Ólafsson tóku á móti gestunum og skipulögðu heimsóknina.
Markmiðið var að fræðast um úrgangsminnkun, endurnýtingu og endurvinnslu á Íslandi. Áður höfðu nemendur Borgarholtsskóla farið til þessara landa til að fræðast um sjálfbærni. Í þessari heimsókn fræddust gestir okkar meðal annars um rannsóknir á nýrri aðferð til að framleiða ál sem dregur mikið úr losun gróðurhúsalofttegunda, ljósatækni í stað fiskineta og gerð moltu í nýrri jarðgerðarstöð Sorpu í Álfsnesi.
Heimsókninni lauk með Gullna hringnum þar sem gestirnir fengu gott yfirlit yfir jarðsögu og jarðfræði landsins og mikilvægi jarðhitans í orkuöflun. Allir voru mjög ánægðir með ferðina og eiga eftir að bera hróður skólans og landsins víða.

Sayed Wahab Hashimi, nemandi á öðru ári í kvikmyndagerð í Borgarholtsskóla, náði þeim frábæra árangri að fá bronsið í smásagnakeppni Félags enskukennara á Íslandi (FEKÍ) í ár með <a href="https://wp.borgo.is/wp-content/uploads/anactivist.pdf">söguna An Activist</a>. Sagan gerist í Afganistan þar sem sögupersónur reyna að lifa af ógnarstjórn Talibana.
Fimmtudaginn 2. mars síðastliðinn tók Sayed Wahab við verðlaunum fyrir þriðja sætið í flokki framhaldsskóla á Bessastöðum úr hendi Elizu Reid forsetafrúar.
Nemendur Borgarholtsskóla hafa verið einstaklega sigursælir í smásagnasamkeppni FEKÍ og hafa sögur frá þeim nánast alltaf lent í þremur efstu sætunum. Það má því segja að mikill sköpunarkraftur ríki í Borgó á hinum ýmsu sviðum.
Sayed Wahab Hashimi er óskað innilega til hamingju með þennan glæsilega árangur.

Stefán Matti Sigurðsson, nemandi á sérnámsbraut, varð á dögunum Íslandsmeistari unglinga í keilu en hann keppir í 1. flokki pilta. Árni Páll Guðjónsson varð í öðru sæti og Ólafur Þór Jónsson í þriðja sæti en þeir eru einnig nemendur á sérnámsbraut Borgarholtsskóla.
Stefáni, Árna og Ólafi er óskað innilega til hamingju með frábæran árangur.

Viðburðurinn <a href="https://namogstorf.is/minframtid/min-framtid-2023/">Mín framtíð </a> fer fram dagana 16.-18. mars í Laugardalshöll í samvinnu við mennta- og barnamálaráðuneytið, sveitarfélög og fagfélög iðn- og starfsgreina. Þar verða 30 framhaldsskólar kynntir ásamt því að <a href="https://verkidn.is/">Verkiðn</a> stendur fyrir  Íslandsmóti iðn- og verkgreina. Keppt er í 22 fagreinum þar sem keppendur takast á við krefjandi og raunveruleg verkefni í samkeppni.
Nemendur í Borgarholtsskóla sem leggja stund á bílamálun og bifreiðasmíði keppa í sínum greinum á mótinu en keppnin er þegar hafin í skólanum. Úrslitin ráðast svo með síðustu verkefnunum sem nemendur vinna af hendi á viðburðinum í Laugardalshöll. Nemendur í biðfreiðasmíði eiga meðal annars að rétta þrjár beyglur á hurð, vinna undirvinnu fyrir réttingu ásamt því að sparsla og slípa svo hurðin sé tilbúin fyrir málun. Nemendur í bílamálun eiga meðal annars að mála panel, líma inn strípur á panelinn og mála strípulitinn í réttum hlutföllum samkvæmt fyrirmælum.
Meðfylgjandi myndir eru teknir af nemendum við vinnu í keppninni.

Útskriftarnemendur á sérnámsbraut hafa verið í starfsnámi einu sinni í viku nú á vorönn. Síðustu fimm vikur hafa nemendur verið í starfsnámi hjá <a href="https://www.takk.is/">Takk hreinlæti </a>og unnið þar ýmis störf. Eftir síðasta vinnudaginn bauð Takk upp á pizzu til að þakka fyrir vel unnin störf.
Starfsfólk Takk hefur tekið vel á móti nemendum sérnámsbrautar Borgarholtsskóla í yfir 20 ár. Þeim er þakkað kærlega fyrir móttökurnar og samstarfið.

Þann 8. mars er Jafnréttisdagur Borgarholtsskóla haldinn hátíðlegur, en dagurinn er eins og kunnugt er alþjóðlegur baráttudagur kvenna. Að þessu sinni var áhersla lögð á stöðu trans einstaklinga í skólanum. Trans ungmenni upplifa fordóma, einelti og útskúfun sökum kyns og kyntjáningar.
Unnur Gísladóttir, kynjafræðikennari, var með stutta kynningu á málefnum trans einstaklinga. Eftir kynninguna var horft á heimildarmyndina The Dreamlife of Georgie Stone. Eftir myndina voru umræður um málefnið þar sem nemendur komu meðal annars með tillögur um hvernig mætti bæta aðstöðu eða líf trans einstaklinga í skólanum.
Jafnréttisdagurinn var mjög vel heppnaður og er jafnréttisnefnd skólans þakkað sérstaklega fyrir skipulagningu dagsins. Jafnréttisnefnd skipa Anton Már Gylfason, áfangastjóri, Sandra Hlín Guðmundsdóttir, náms- og starfsráðgjafi og Unnur Gísladóttir, kennari.

Kristinn Snær Guðjónsson, nemandi á afrekssviði Borgarholtsskóla, er á leið til Bandaríkjanna að spila fótbolta á skólastyrk. Kristinn Snær er 19 ára gamall og mun útskrifast af afrekssviði Borgarholtsskóla í vor. Eftir útskrift liggur leið hans til Indiana fylkis í Oakland City University þar sem hann mun stunda nám og spila fótbolta með liði skólans.
Kristni er óskað kærlega til hamingju með styrkinn og óskað góðs gengis í Bandaríkjunum.

Nemendur í grafískri hönnun á listnámsbraut Borgarholtsskóla hafa átt í samstarfi við nemendur í MÍT, Menntskólanum í tónlist núna á vorönn. Nemendur í grafískri hönnun hafa hannað kynningarefni fyrir vortónleika MÍT sem haldnir verða í hátíðarsal FÍH 24. og 25. mars. Tónleikarnir eru að þessu sinni tileinkaðir tónlistarkonunni Amy Winehouse en hún hefði orðið 40 ára í ár hefði hún lifað.
Samstarf milli skólanna felst í því að nemendur á öðru ári í grafískri hönnun í Borgó hanna kynningarefni og nemendur í áfanga í viðburðarstjórnun í MÍT sjá um kynningu á tónleikunum. Þrjár tillögur af veggspjöldum, sem þóttu skara fram úr, voru valdar. Valið var mjög erfitt því margar framúrskarandi tillögur voru í boði. Sú tillaga sem þó að lokum var valin er hönnuð af John Berniel Gavilo Quirona. Tillaga númer tvö var hönnuð af Alexöndru Ýr Harðardóttur og tillaga þrjú var hönnuð af Snærúnu Ynju Hallgrímsdóttur Smith. Nemendur í grafískri hönnun nutu leiðsagnar Kristínar Maríu Ingimarsdóttur, kennara í garfískri hönnun en kennari í viðburðarstjórnun í MÍT er Gunnhildur Einarsdóttir.
Öll veggspjöldin munu verða til sýnis í húsnæði MÍT/FÍH þegar tónleikarnir verða haldnir og standa eitthvað áfram.
Samstarf skólanna hófst fyrir þremur árum síðan og er komin góð reynsla á það. Á þessum vortónleikum MÍT má oft sjá og heyra efnilega nemendur sem eru að taka sín fyrstu skref í tónlistarheiminum á Íslandi og sama má segja um ungu hönnuðina úr Borgó, sem líka eru að taka sín fyrstu skref á sínu sviði.

Bjartur Eldur Þórsson, nemandi á afrekssviði Borgarholtsskóla, er á leið til Bandaríkjanna að spila amerískan fótbolta á skólastyrk. Bjartur spilar amerískan fótbolta með Einherjum í Kópavogi og er þar í byrjunarliði. Bjartur hefur hlotið skólastyrk við Kiski-skólann í Pennsylvaniu fylki í Bandaríkjunum. Hann er fyrsti íslendingurinn sem hlýtur skólastyrk í amerískum fótbolta.
<a class="secure external" title="Vísir.is (Opnast í nýjum vafraglugga)" href="https://www.visir.is/g/20232385573d/fyrsti-islendingurinn-a-skolastyrk-aetlar-alla-leid-i-nfl" target="_blank" rel="noopener">Vísir.is</a> tók viðtal við Bjart um styrkinn og ameríska fótboltann. Bjarti er óskað kærlega til hamingju með styrkinn.

Nemendur í pípulögnum sitja nú lotu í  logsuðu (LSU1A05). Þau fengu það verkefni að hanna lampa úr 15 mm eirrörum og skeyta þeim saman með ólíku suðuefni.
Nemendur notuðu fjögur mismunandi efni til að setja saman eirrör við eirrör og eirrör við stál. Plasmaskurðarvél var einnig notuð við verkefnið. Efnin sem notuð voru eru silfur, kopar, eirslaglóð og tin.
Á myndunum má sjá þær frumlegu leiðir sem nemendur völdu til að leysa verkefnið.

Afrekssvið Borgarholtsskóla fékk góða heimsókn frá afrekssviði Fjölbrautaskóla Vesturlands á Akranesi nýlega. Fjörtíu nemendur og tveir kennarar komu í heimsókn og tóku þátt í hefðbundnu starfi sviðsins. Einnig fengu þau kynningu á þremur stoðþáttum afrekssviðsins en þeir eru; andlegur styrkur, félagslegur styrkur og líkamlegur styrkur (og tækni).
Dagurinn hófst á styrktaræfingum í fimleikasalnum í Egilshöll en þaðan var farið í tækniæfingar í þeim greinum sem möguleiki var á. Dagurinn endaði svo með frábærri fræðslu frá Hreiðari Haraldssyni, kennara á afrekssviði.
Afrekssviði FVA er þakkað kærlega fyrir frábæra heimsókn og vonir standa til að efla þetta góða samstarf.

Venja hefur verið að mæla líkamlega þætti hjá nemendum á afrekssviði og er það gert á hverju ári. Í þetta sinn voru um fimm mælingar að ræða; hæð og þyngd (valkvætt), CMJ, Davies og 30m sprettur.
Unnbjörg Jóna Ómarsdóttir frá Smart Timer heimsótti afrekssviðið en hún er hluti af teymi sem hannar nú smáforrit sem gera hraðamælingar einfaldari og notendavænni. Bornar voru saman niðurstöður úr 30m spretti, annars vegar með notkun hraðhliða frá Háskólanum í Reykjavík og hins vegar með notkun Smart Timer smáforritsins. Niðurstöðurnar voru mjög svipaðar og því verður spennandi að fylgjast með þróun þessa forrits.
<a class="secure external" title="CMJ stendur fyrir Countermovement Jump (Opnast í nýjum vafraglugga)" href="https://www.scienceforsport.com/countermovement-jump-cmj/" target="_blank" rel="noopener">CMJ stendur fyrir Countermovement Jump</a> . Markmið prófsins er að mæla lóðréttan stökkraft. Nemendur fá tvær tilraunir, fyrri með hendur á mjöðm allan hreyfiferilinn og seinni með hendur lausar. Með réttri tækni á nemandi að hoppa hærra í seinni tilraun.
Í Davies prófinu þreyta nemendur vöðvaúthaldspróf í eina mínútu. Nemendur eru í armbeygjustöðu með 91 cm bil á milli handa. Í eina mínútu eiga þeir að reyna að snerta handarbak gagnstæðrar handar eins oft og hægt er.
30m spretturinn var framkvæmdur með notkun hraðahliðs og smáforrits frá Smart Timer. Nemendur fengu tvær tilraunir.
Kennarar og nemendur stóðu sig vel í framkvæmd mælinganna og það er mál manna að flæðið hafi verið sérstaklega gott og það hafi verið almenn ánægja með daginn. Niðurstöðurnar verða svo aðgengilegar nemendum fljótlega á næstu vikum. Það er sérstaklega ánægjulegt að þeir nemendur sem þreyta sömu próf í yngri landsliðum geta þá borið saman niðurstöður og bætt við gagnabankann sinn.
Hægt er að fylgjast með <a class="secure external" title="afrekssviði Borgarholtsskóla á Instagram (Opnast í nýjum vafraglugga)" href="https://www.instagram.com/afrekssvid/" target="_blank" rel="noopener">afrekssviði Borgarholtsskóla á Instagram</a> en þar má finna <a class="secure external" title="stutt myndband frá mælingadeginum (Opnast í nýjum vafraglugga)" href="https://www.instagram.com/p/CoqO1NGoNzS/" target="_blank" rel="noopener">stutt myndband frá mælingadeginum</a> .

Nemendur í átakasögu (SAG3B05) hjá Þórdísi Önnu Hermannsdóttur, sögukennara, fengu á dögunum flóttakonu frá Úkraínu í heimsókn. Tetiana Korolenko kom til Íslands fljótlega eftir innrás Rússa inn í landið. Í dag starfar hún sem menningarmiðlari á Velferðarsviði Reykjavíkurborgar þar sem hún hjálpar öðru fólki frá Úkraínu með ýmis málefni tengd dvöl þeirra á Íslandi.
Tetiana sagði nemendum frá reynslu sinni og upplifun. Hún sagði frá lífi sínu í Kyiv fyrir stríð og undrun sinni þegar stríðið braust út. Hún talaði um að Íslendingar hefðu tekið vel á móti flóttafólki frá Úkraínu. Nemendur voru áhugasamir og spurðu fjölda spurninga.
Tetiana er þakkað fyrir komuna og fyrir að veita nemendum innsýn inn í líf fólks á flótta.

Fimmtudagskvöldið 9. febrúar var glæsiballið, sem er árshátíð nemenda,  haldið í fyrsta skipti eftir nokkurra ára hlé.
Glæsiballið fór fram í matsal skólans þar sem starfsfólk þjónaði til borðs en á boðstólnum var kalkúnn í aðalrétt og súkkulaðimús í eftirrétt. Fram komu Erpur Eyvindarson, JóiPé, Issi, DJ Ragga Hólm ásamt Jónsa sem var veislustjóri kvöldsins.
Mikil ánægja var með að tekist hefði að endurvekja þá skemmtilegu hefð að halda glæsiballið að loknum skóhlífadögum. Nemendur skemmtu sér vel og voru í alla staði til fyrirmyndar.

Dagana 9. og 10. febrúar voru skóhlífadagar í Borgarholtsskóla. Skóhlífadagar eru þemadagar skólans og eru þeir haldnir á vorönn. Skóhlífadagarnir draga nafn sitt af því að á fyrstu árum skólans voru allir nemendur í bláum skóhlífum og setti það sterkan svip á ganga skólans.
Á skóhlífadögum er hefðbundin kennsla lögð niður en í stað hennar er boðið upp á fjölbreytt námskeið. Skólaskylda er þessa daga og verður hver nemandi að velja sér þrjú námskeið til að mæta á. 
Námskeiðin voru fjölbreytt að venju en til dæmis var boðið upp á jeppaferð, borðspil, teikninámskeið, kvikmyndasýningar á ýmsum tungumálum, matreiðslunámskeið með Eurovision þema, fuglaskoðun, badminton, skauta og prjónanámskeið. Auk þess var farið í heimsóknir á Þjóðminjasafnið, Landnámssýninguna og Listasafn Reykjavíkur.
Skóhlífadagar eru kærkomin tilbreyting frá hefðbundnu skólastarfi. Þeim lýkur svo með Glæsiballinu, árshátíð nemenda, sem er nú haldin í fyrsta sinn í nokkur ár.

Fulltrúi BYKO kom í heimsókn í Borgarholtsskóla í síðustu viku. Hann kom færandi hendi þar sem BYKO gaf skólanum skrúfvélar, stingsagir og fleiri handverkfæri til notkunar í kennslu við pípulagnir sem er ný námsbraut í Borgarholtsskóla.
BYKO er þakkað kærlega fyrir þessa rausnarlegu gjöf sem mun nýtast vel í kennslu.

Nemendur á listnámsbraut hafa ekki setið auðum höndum í byrjun vorannar. Þau hafa farið á listasýningar, í heimsókn til fyrirtækja og á leiksýningar. Nemendur í leiklist var boðið á æfingu á sýninguna Allt sem þið viljið eftir Shakespeare í Þjóðleikhúsinu auk þess að nemendur á kvikmyndakjörsviði fóru í heimsókn til Kukl.
Nemendur á listnámsbraut fóru í vettvangsferð á sýningu Pussy Riot í <a class="external" title="Kling og bang (Opnast í nýjum vafraglugga)" href="http://this.is/klingogbang/" target="_blank" rel="noopener">Kling og bang</a>. Nemendur jafnt sem kennarar voru mjög ánægðir með heimsóknina og Kling og bang er þakkað sérstaklega fyrir viðtökurnar.
Hægt er að fylgjast með því sem er að gerast á listnámsbraut á <a class="external" title="Instagram (Opnast í nýjum vafraglugga)" href="http://www.instagram.com/listnamsbraut.borgo" target="_blank" rel="noopener">Instagram</a>.

Nemendur á þriðja ári kvikmyndakjörsviðs fóru ásamt Þorgeiri Guðmundssyni, kennara í kvikmyndagerð, í heimsókn til Kukl í Gufunesi. Kukl er fyrirtæki sem sérhæfir sig í tækjaleigu til framleiðslufyrirtækja við framleiðslu á sjónvarpsþáttum, bíómyndum og ljósmyndun. Finnur Jóhannsson tók á móti hópnum og sýndi þeim nýjustu græjur og tæki auk þess að fræða nemendur um þau verkefni sem Kukl vinnur að.
Heimsóknin tókst vel til og nemendur skemmtu sér vel. Kukl er þakkað kærlega fyrir viðtökurnar.

Á dögunum fékk Borgarholtsskóli heimsókn frá Toyota. Hörður Bjarnason starfsmaður Toyota kom með vetnisbíl og hélt fyrirlestur fyrir nemendur í áfanganum Raf- og blendingsbílar (RBB3A05). Það er virkilega mikilvægt  fyrir nemendur í bíliðngreinum að kynnast mismunandi bifreiðum í námi sínu og því var þessi heimsókn kærkomin.
Toyota hefur löngum átt í góðu samstarfi við Borgarholtsskóla og er þeim þakkað kærlega fyrir innlitið.
&nbsp;
<a href="/namsbrautir/biltaeknibrautir">Hlekkur yfir í bílabraut</a>
<a href="https://borgo.opinkerfi.dev/namsbrautir/biltaeknibrautir">Annar hlekkur</a>

<div id="ART:Article" class="EPLICA_editzone">
<div id="ART:Article" class="EPLICA_editzone">
Kennarar Borgarholtsskóla eru metnaðarfullir og duglegir við að gera ný og spennandi verkefni sem höfða vel til nemenda.
Eitt dæmi um slíkt er eldstæði (e. rocket stove) sem nemendur í málmi unnu í magsuðu. Þetta var töluverð vinna en 70 suður þurftu við smíði eldstæðisins. Að verki loknu fannst öllum  þetta vel þess virði og nemendurnir voru alsælir og sáu mikil not fyrir eldstæðið.
Á næstunni stendur svo til að hanna einhvers konar grill ofan á elstæðið en í millitíðinni hafa nemendur notað þetta til að grilla sykurpúða.
</div>
</div>

<div id="ART:Article" class="EPLICA_editzone">
Kennsla á vorönn 2023 hefst 5. janúar samkvæmt stundatöflu. Námsgangalista má finna á <a href="http://www.inna.is/" target="_blank" rel="noopener">Innu</a>.
Töflubreytingar hefjast 4. janúar. Aðrir nemendur en útskriftarefni senda inn beiðnir um töflubreytingar rafrænt í gegn um <a href="http://www.inna.is/" target="_blank" rel="noopener">Innu</a> og verða þær afgreiddar svo fljótt sem auðið verður. <a href="https://wp.borgo.is/wp-content/uploads/Leidbeiningar-vegna-toflubreytinga-haust-2022.pdf">Leiðbeiningar um rafrænar töflubreytingar</a>.
Kynningarfundur fyrir dreifnámsnemendur á félagsvirkni- og uppeldissviði verður 5. janúar kl. 17.00 á Zoom.
Hægt er að fylgjast með lífinu í skólanum á <a href="https://www.instagram.com/borgo_skoli/" target="_blank" rel="noopener">instagramsíðum skólans</a> og <a href="https://www.instagram.com/nfbhs/" target="_blank" rel="noopener">nemendafélagsins</a> .
Spurningar og svör varðandi skólann.
</div>

Nemendur í áfanganum þjónusta og ábyrgðarviðgerðir (ÞJÁ2A05) fóru á dögunum í heimsókn í KIA umboðið ásamt Hreini Ágústi Óskarssyni, kennara. Davíð Már Steinarsson tók á móti nemendum og sýndi þeim aðstöðuna. Nemendur voru áhugasamir og sinntu því sem beðið var um með bros á vör. Nemendur höfðu gaman að heimsókninni og voru ánægðir með móttökurnar.
Þetta er í annað sinn sem nemendur í þessum áfanga heimsækja Öskju/KIA og er mikil ánægja með þessar heimsóknir bæði hjá nemendum og kennurum Borgarholtsskóla sem og starfsfólki KIA.

Föstudaginn 16. desember 2022 fór fram brautskráning í Borgarholtsskóla.
Skólahljómsveit Mosfellsbæjar undir stjórn Daða Þórs Einarssonar spilaði í anddyri skólans á meðan gestir voru að koma sér fyrir í sætum.
Ársæll Guðmundsson skólameistari og Ásta Laufey Aðalsteinsdóttir aðstoðarskólameistari forfölluðust bæði á síðustu stundu og Anton Már Gylfason áfangastjóri og Magnea Hansdóttir, fjármálastjóri, hlupu í skarðið.
Anton Már setti athöfnina og gaf orðið til Nökkva Jarls Bjarnasonar kennara sem var kynnir og stýrði athöfninni.
Magnea Hansdóttir flutti annál annarinnar. 1268 nemendur stunduðu nám við skólann auk 60 grunnskólanema sem tóku valáfanga í málm- og véltæknigreinum. Hún fór yfir það helsta sem gerst hefur á önninni, bæði í hinu formlega skólastarfi og hjá Nemendafélagi skólans sem staðið hefur sig mjög vel.
Sönghópur Borgarholtsskóla undir stjórn Guðbjargar Hilmarsdóttur kennara flutti tvö tónlistaratriði. Fyrra lagið sem þau fluttu var Fallegur dagur en lagið og textinn er eftir Bubba Morthens. Hið síðara var hinn þekkti jólasálmur Heims um ból eftir Franz Gruber við texta Sveinbjörns Egilssonar.
Anton Már og Magnea sáu um brautskráningu nemenda ásamt sviðstjórum en 142 nemendur voru brautskráðir af mismunandi námsbrautum skólans og sumir útskrifuðst af fleiri en einni braut. Fjölmörg verðlaun og viðurkenningar voru veitt fyrir mjög góðan námsárangur. Birta Sigríður Hoffman Arnarsdóttir útskrifaðist með frábæran námsárangur frá leikskólaliðabraut og hlaut hæstu einkunn á stúdentsprófi en hún lauk jafnframt viðbótarnámi til stúdentsprófs. Það er hefð í Borgarholtsskóla að færa útskriftarnemum í desember hýasintu að gjöf og út frá þeirri hefð var ekki brugðið.
Thelma Rós Arnardóttir flutti kveðjuávarp útskriftarnema.
Anton flutti ræðu Ársæls til útskriftarnema. Hann gerði hugarfar og hamingjuna að umtalsefni og hvað það væri sem gerði fólk hamingjusamt. Hann hvatti nemendur til þess að tileinka sér hugarfar grósku en það hugarfar er jákvætt og uppbyggjandi og einkennist meðal annars af því að taka áskorunum með gleði, líta á gagnrýni sem tækifæri, láta mistök verða lærdóm og hafa hugrekki til að reyna eitthvað nýtt. Umfram allt hvatti hann nemendur til að njóta líðandi stundar og vera þakklát fyrir hana.
Að lokum var útskriftarnemum óskað til hamingju með áfangann, gæfu og gengis.
Öllu starfsfólkinu var þakkað fyrir vel unnin störf á önninni ásamt því að þeim, sem með einum eða öðrum hætti, komu að framkvæmd og skipulagningu brautskráningarinnar voru færðar sérstakar þakkir.
Fleiri myndir frá athöfninni eru á <a class="secure external" title="facebook síðu skólans (Opnast í nýjum vafraglugga)" href="https://www.facebook.com/Borgarholtsskoli/" target="_blank" rel="noopener">facebook síðu skólans</a> .

Nemendur í málmiðngreinum hafa unnið að fjölbreyttum verkefnum á haustönn og búið til ýmiss konar nytjahluti. Þar á meðal eru lampar, kertastjakar og blómavasar.
Verkefnin voru unnin í TIG suðu, MAG suðu, logsuðu og rennismíði. Mismunandi tækni var beitt og sumir hlutirnir voru teiknaðir í teikniforriti og skornir út í tölvustýrðri plasmaskurðarvél.
Nemendur í bílamálun lögðu hönd á plóg því þau máluðu suma gripina. Slík samvinna er alltaf skemmtileg.

Hópur af nemendum af málm- og véltæknibrautum ásamt kennurum fór í heimsókn til Prentmets Odda á dögunum.
Prentmet Oddi er umhverfisvottað fyrirtæki og öll framleiðsla þeirra kemur úr nytjaskógum. Nemendur skoðuðu tækjakost fyrirtækisins og hvernig þeim er viðhaldið en það er nátengt námi í málmiðngreinum.
Nemendur höfðu virkilega gaman af heimsókninni og er Prentmet Odda þakkað kærlega fyrir góðar móttökur.

Nemendur í áfanganum Skapandi hugmyndavinna og viðburðastjórnun héldu pop up markað 17. nóvember síðastliðinn. Markmið áfangans er að vinna verkefni í anda Heimsmarkmiða Sameinuðu Þjóðanna en þar er sjálfbærni höfð að leiðarljósi. Kennarar áfangans eru Helga Kristrún Hjálmarsdóttir og Kristveig Halldórsdóttir.
Á pop up markaðnum seldu nemendur notaðan fatnað, endurunnar töskur og poka, höfðu pílukast og smákökusölu ásamt fleiru. Ákveðið var að ágóði markaðarins færi í að kaupa tvær spjaldtölvur fyrir börn sem dvelja í Kvennaathvarfinu. Framkvæmdastjóri athvarfsins Linda Dröfn Gunnarsdóttir kom í skólann, hitti nemendur og tók á móti gjöfinni fyrir hönd Kvennaathvarfsins.
Nemendum og kennurum er hrósað fyrir þetta frábæra framtak og vonandi koma spjaldtölvurnar að góðum notum í athvarfinu.

Væntanlegir útskriftarnemar gerðu sér dagamun í dag, föstudaginn 2. desember, og fögnuðu væntanlegum skólalokum hér í Borgó.
Þau mættu í skólann í  morgun og borðuðu morgunverð með starfsfólki skólans og færðu því súkkulaðiköku. Að því loknu ætluðu þau að fara í Keiluhöllina og enda svo dagskránna á að bregða á leik í ratleik í miðborg Reykjavíkur.
Þetta er í fyrsta skipti í sögu skólans sem útskriftarnemar dimmitera í desember en hingað til hafa nemendur sem stefna á útskrift um jól tekið þátt í dimmisjón vorið á undan.
Nemendum er þakkað fyrir samveruna og óskað góðrar skemmtunar í dag.

Miðvikudaginn 1. desember veitti enskudeildin fimm nemendum viðurkenningu fyrir smásögur skrifaðar á ensku sem þeir sendu inn í undankeppni Smásagnasamkeppni FEKÍ (Félags enskukennara á Íslandi). Allir enskukennarar skólans voru í dómnefndinni sem hafði úr vöndu að ráða enda þátttaka betri en nokkru sinni fyrr. Fjölmargar smásögur bárust í keppnina og margar þeirra voru mjög vel skrifaðar, bæði hvað málfar og efnistök varðar. Þema keppninnar í ár var Power.
Þessir nemendur urðu hlutskarpastir í keppninni:
<ul>
<li>Óliver Tumi Auðunsson með söguna „Do You Dare to Hear the Silence?“</li>
<li>Hugrún Vigdís Viktor Hákonar með söguna „A Game He Likes to Play“</li>
<li>Daniela Galaszewska með sögurnar „Endless Power“ og „Heaven City Robots“</li>
<li>Niels Salómon Ágústsson Hansen með söguna „War Stories“</li>
<li>Sayed Wahab Hashimi með söguna „An Activist“</li>
</ul>
Verðlaunahafarnir fengu allir smásagnasafnið The Best Short Stories 2022: The O. Henry Prize Winners, viðurkenningarskjal og konfekt frá Gæðagötu (e. Quality Street). Kennarar enskudeildar Borgarholtsskóla vilja þakka öllum þeim nemendum sem tóku þátt og vonast eftir enn betri þátttöku á næsta ári.

Nemendur í sögu (SAG3A05) heimsóttu varðveislu- og rannsóknarmiðstöð Þjóðminjasafnsins í Hafnarfirði á dögunum. Nemendur fengu að kynnast starfinu sem fer þar fram en á móti hópnum tóku þrír sérfræðingar rannsóknarmiðstöðvarinnar og skiptu hópnum niður í þrjá hópa.
Einn hópurinn fékk að kíkja inn á skrifstofu sérfræðings í þrívíddarskönnunum og skannaði hún mannskjálka fyrir hópinn til að sýna hvernig skönnunin virkar. Síðan sýndi hún nemendum afraksturinn í tölvunni en stefnan er að skanna inn allar viðkvæmar minjar. Ástæður fyrir því eru m.a. þannig að hægt sé að nota skönnunina við rannsóknir án þess að ganga á minjarnar sjálfar auk þess sem minjarnar varðveitast til frambúðar á tölvutækuformi. 
Sérfræðingur í vopnum sýndi nemendum tvö gömul sverð auk örvarodda og hnífa. Annað sverðið var frá landnámsöld. 
Þriðji sérfræðingurinn sýndi nemendum nokkur mannabein, lærleggi sem höfðu gróið eftir brot, höfuðkúpu manns sem hafði verið veginn með exi en hann fannst við fornleifauppgröft í Mosfellsdal.
Nemendur voru afar áhugasamir um starfsemi rannsóknarmiðstöðvarinnar  þó sumum hafi fundist erfitt að skoða mannabeinin.

Nemendur á þriðja ári á listnámsbraut heimsóttu hönnunarstofuna Pipar/TBWA í síðustu viku. Pipar/TBWA er auglýsingastofa sem vinnur við birtingar á öllum hugsanlegum miðlum. Stofan er einnig framarlega á sviði stafrænnar markaðssetningar og hafa þau unnið mörg verðlaun á því sviði.
Nemendur fengu innsýn inn í störf hönnuða á stofunni og það veitti þeim innblástur að upplifa andrúmsloft vinnustaðarins.
Ferðin gekk mjög vel og nemendum fannst mjög áhugavert og spennandi að sjá hvernig starf grafískra hönnuða er í raun.

Hinseginfélag Borgarholtsskóla stóð fyrir dragkeppni sem haldin var á dögunum. Dragdrottningin og fyrrum nemandi Borgarholtsskóla, Lola von Heart, var dómari og stjórnaði umræðum eftir keppnina.
Nemendafélag Borgarholtsskóla bauð upp á veitingar og útvegaði verðlaun fyrir keppnina. Sigurvegari keppninnar var Smokeyquarts the first, í öðru sæti varð Álfheiður Björk og í þriðja sæti Mrs. Chris.
Keppnin var lífleg og skemmtilegt og ljóst er að nemendur Borgarholtsskóla eiga framtíðina fyrir sér í dragi.

Nemendur á fyrsta ári í Borgarholtsskóla unnu á dögunum verðlaun fyrir myndband sem þau sendu inn í verðlaunaleik Forvarnardagsins. Þema verðlaunaleiksins var Verndandi þættir og lögðu nemendur skólans áherslu á þátttöku í skipulögðu íþrótta og tómstundastarfi í sínu verkefni.
Verðlaunin voru afhent með viðhöfn á Bessastöðum laugardaginn 26. nóvember síðast liðinn. Það voru þau Arnar Már Atlason, Ísold Hekla Þórðardóttir og Óðinn Máni Gunnarsson sem unnu verðlaunin en verkefni þeirra var unnið undir stjórn Flosa Jóns Ófeigssonar og Guðbjargar Hilmarsdóttur, kennara á listnámsbraut.
Borgarholtsskóli vann keppni framhaldsskólanna en í flokki grunnskóla varð Borgarhólsskóli á Húsavík hlutskarpastur. Guðni Th. Jóhannesson, forseti Íslands og Alma Möller landlæknir fluttu ávörp við afhendingu verðlaunanna og viðstödd voru nemendur skólanna ásamt foreldrum og forráðafólki auk þess sem kynningarefnið var sýnt.
Embætti landlæknis stendur fyrir Forvarnardeginum í samstarfi við embætti forseta Íslands, ÍSÍ, UMFÍ, Heimili og skóla, Rannsókn og greiningu, Reykjavíkurborg, SAFF, Samband sveitarfélaga, Samfés og Skátana. Forvarnardagurinn er haldinn ár hvert og er sjónum sérstaklega beint að ungmennum í 9. bekk og á fyrsta ári í framhaldsskóla.
Nemendum og kennurum er óskað innilega til hamingju með þennan frábæra árangur.

Borgarholtsskóli tekur þessa dagana þátt í Samsýningu framhaldsskólanna sem haldin er í Ráðhúsi Reykjavíkur. Markmið sýningarinnar er meðal annars að gefa nemendum tækifæri til að sýna almenningi afrakstur verkefna sinna, mynda tengsl við aðra nemendur og sýna fram á mikilvægi þess að styðja við og efla menntun á sviði nýsköpunar, hönnunar, lista og verklegra greina í íslensku samfélagi.
Í ár tók Borgarholtsskóli þátt með fjögur verkefni eða fyrirtæki. Fyrirtækin voru <a href="https://www.instagram.com/hagl_skotglos/" target="_blank" rel="noopener">HAGL</a> með endurnýtt haglaskot sem breytt var í skotglös (fyrir heilsuskot), <a href="https://www.instagram.com/spun_isl/" target="_blank" rel="noopener">Spún</a> með handhæga lausn á pappa- eða plastskeiða „vandanum&#8220;, <a href="https://www.instagram.com/glasgohandverk/" target="_blank" rel="noopener">Glasgó</a> með glasamottur úr gallabuxum og <a href="https://www.instagram.com/skilurdu_/" target="_blank" rel="noopener">Skilurðu</a> sem er fréttamiðill á máli ungmenna. Eitt fyrirtæki frá Borgarholtsskóla vann til verðlauna en það var Skilurðu sem vann verðlaun í flokki samfélagslegrar nýsköpunar.
Verkefnin hjá nemendum Borgarholtsskóla voru virkilega vönduð og Skilurðu er óskað innilega til hamingju með verðlaunin.

Nemendur á listnámsbraut fóru saman í bíó á dögunum í Bíó  Paradís og sáu Gaukshreiðrið. Fyrir myndina var fræðisla um myndina og eftir að myndin hafði verið sýnd voru umræður. Nemendur höfðu virkilega gaman að sýningunni og gæddu sér á poppi og gosi á meðan.
Bíóferðin var hluti af verkefni í áfanga um listir og menningu sem Guðbjörg Hilmarsdóttir og Helga Kristrún Hjálmarsdóttir kenna. Einnig voru með í för nemendur úr skapandi námi sem Helga Kristrún kennir.
Bíóferðin tókst með eindæmum vel og er Bíó Paradís þakkað kærlega fyrir hlýlegar móttökur.

Nemendur á þriðja ári í listnámi í áfanganum skapandi hugmyndavinna héldu pop-up markað í hádeginu í matsalnum. Allur ágóði af markaðinum rennur til kvennaathvarfsins til að kaupa spjaldtölvur fyrir börn sem dvelja þar.
Áfanginn er byggður þannig upp  að nemendur vinna eftir <a class="secure external" title="Heimsmarkmiðum sameinuðu þjóðanna (Opnast í nýjum vafraglugga)" href="https://www.heimsmarkmidin.is/forsida/heimsmarkmidin/" target="_blank" rel="noopener">Heimsmarkmiðum sameinuðu þjóðanna</a>. Þetta tiltekna verkefni tengist markmiðinu Ábyrg neysla og framleiðsla. Nemendur voru til að mynda að búa til poka úr endurunnum textíl, selja kökur og kakó, selja jólavarning og margt fleira.
Markaðurinn tókst ótrúlega vel og voru nemendur mjög metnaðarfullir í verkefnum sínum.

Nemendur á félagsvirkni- og uppeldissviði eyddu tveimur kennslustundum síðastliðinn mánudag með nemendum sérnámsbrautar.
Nemendur í áfanganum FÉV2A05 kynntu sig fyrir nemendum sérnámsbrautar og fengu að vera í kennslustund með þeim. Nemendurnir fylgdust með kennslu, aðstoðuðu nemendur sérnámsbrautar við námið og fengu tíma til að spjalla og kynnast nemendum brautarinnar. Í seinni tímanum voru nemendur félagsvirkni- og uppeldissviðs búnir að skipuleggja uppbrot. Annars vegar spiluðu þau bingó og hins vegar fléttuðu þau vinabönd.
Þetta heppnaðist afskaplega vel og áttu bæði nemendur félagsvirkni- og uppeldissviðs og sérnámsbrautar góða stund saman.

Dagur íslenskrar tungu var haldinn hátíðlegur með dagskrá á Borgarbókasafninu í Spöng 16. nóvember.
Kór nemenda Borgarholtsskóla söng íslensk lög undir stjórn Guðbjargar Hilmarsdóttur auk þess sem Harpa Guðmundsdóttir, nemandi á fyrsta ári, las frumsamið ljóð. Ólafur Egill Egilsson spjallaði við nemendur um íslenska tungu og störf sín sem leikari, leikstjóri og handritshöfundur. Nemendur höfðu margs að spyrja og Ólafur svaraði þeim skýrt og skilmerkilega.
Móðurmálið var greinilega lifandi á vörum gesta og Borgarbókasafninu er þakkað kærlega fyrir hlýlegar móttökur.

<a class="secure external" title="Unglist, listahátíð ungs fólks (Opnast í nýjum vafraglugga)" href="https://hitthusid.is/unglist/" target="_blank" rel="noopener">Unglist, listahátíð ungs fólks</a> , er núna í fullum gangi og má segja að nemendur Borgarholtsskóla hafi komið víða við á þessari frábæru hátíð. Leiktu Betur, sem er spunakepnni milli framhaldsskóla, fór fram um helgina í Tjarnarbíói og voru Borghyltingar fyrirferðamiklir í þeirri keppni.
Leikfélag Appollo hefur staðið fyrir æfingum síðustu vikurnar undir stjórn Flosa Jóns Ófeigssonar, leiklistarkennara, til að undirbúa liðið fyrir keppnina. Keppnin var spennandi og tapaði Borgó naumlega með einu stigi í undanúrslitum. Borghyltingar fjölmenntu til að fylgjast með keppninni og studdu sitt fólk. Niðurstaðan var þriðja sætið að þessu sinni og óskum við nemendum til hamingju með þennan árangur.
Leiklistarnemendur skólans voru þó ekki einu fulltrúar skólans á hátíðinni en einnig sáu nemendur á kvikmyndabraut um streymið frá viðburðinum auk þess sem þeir sáu um upptökur og streymi frá ýmsum öðrum viðburðum á hátíðinni.

Kór Borgarholtsskóla fór í heimsókn í Borgir síðastliðinn miðvikudag. Þar sungu þau fyrir eldri borgara í Grafarvogi. Sungin voru þekkt íslensk dægurlög ásamt nokkrum erlendum. Kór Borgarholtsskóla hefur sungið árlega í Borgum frá 2016.
Mikil ánægja var með tónleikana og var nemendum boðið upp á kaffi og köku eftir tónleikana. Birna Róbertsdóttir í Borgum afhenti Guðbjörgu Hilmarsdóttur, kórstjóra og söngkennara, fána frá Korpúlfum sem þakklætisvott fyrir farsælt samstarf.

Fimmtíu nemendur á listnámsbraut sáu sýninguna Vertu úlfur í Þjóðleikhúsinu þriðjudaginn 1. nóvember ásamt kennurum sínum Flosa Jóni og Guðbjörgu.
Þjóðleikhúsið bauð nemendunum á sérstaka sýningu þar sem umræður fóru fram að lokinni sýningu. Opið var fyrir spurningar eftir kynningar aðstandenda sýningarinnar og nýttu nemendur Borgarholtsskóla sér það og settu fram tvær spurningar.
Nemendur voru skólanum til sóma og var almenn ánægja með sýninguna.

Í tilefni bleika dagsins 14. október síðastliðinn seldu nokkrar stúlkur úr nemendafélagi skólans bleikar möndlukökur og bleikan kristal til styrktar Krabbameinsfélagi Íslands. Birgðir þeirra seldust upp á rúmum hálftíma og söfnuðust 53 þúsund krónur.
Þær Bergdís, Dís, Elísa og Margrét afhentu svo Krabbameinsfélaginu styrkinn í síðustu viku þar sem vel var tekið á móti þeim. Árni Reynir Alfredsson, forstöðumaður markaðsmála og fjáröflunar, tók á móti styrknum. Hann tók fram hversu dýrmætt það er að fá slíka styrki vegna þess að félagið sé eingöngu rekið á styrkjum.
Ljóst að Borgarholtsskóli er ríkur af framtaksömum og hugmyndaríkum nemendum og eiga þessar stúlkur hrós skilið.

Í málmiðnum eru margir skemmtilegir hlutir sem verða til hjá nemendum. Oftast þurfa nemendur að klára til þess að ljúka áföngum en þeir nemendur sem ná að ljúka smíði á öllum verkefnum plötuvinnu eiga möguleika á að smíða aukaverkefni ef tími vinnst til.
Jóhann Snær Hannesson, nemandi í plötuvinnu, smíðaði áhugavert verkefni nú á dögunum þegar hann smíðaði festingu fyrir hitablásara sem á að fara í bílinn hjá honum. Hann fann tölvuteikningu af festingu og skar hana síðan út í plasma skurðarvél.
Nemendur í MAG suðu fengu verkefni um að hanna sinn eigin hlut og smíða í síðasta tíma. Hugmyndaauðgi nemenda var mikil eins og sjá má á afrakstrinum. Nemendur notuðu 2 og 4 mm stál og sumir hlutar verkefnanna voru skornir út í plasma skurðarvél.
Virkilega flott verkefni hjá þessum nemendum og skemmtilegt þegar hægt er að vinna að einhverju sem tengist þeirra eigin hugðarefnum.

Fimmtudaginn 13. október var hinn árlegi lýðræðisfundur haldinn. Á lýðræðisfundum gefst nemendum tækifæri til að viðra skoðanir sínar og rökræða þær við samnemendur.
Umræðan fór fram í matsalnum en nemendur skiptust niður á borð og á hverju borði var kennari sem var hópstjóri en umræðan sjálf var alfarið í höndum nemenda.
Umræðuefnin voru þrjú:
<ul>
<li>Námið (uppsetning náms, námsmat o.fl.)</li>
<li>Skólinn (húsgögn, aðstaða o.fl.)</li>
<li>Félaglíf (skólabragur, viðburðir o.fl.)</li>
</ul>
Eftir umræðurnar voru helstu niðurstöður hvers hóps kynntar. Meðal þeirra atriða sem nemendur töldu upp varðandi skólann var að nemendur vildu fá betri kaffistofu fyrir nemendur í málm- og bíliðngreinum, fleiri sófa í skólann, aðstöðu til að sýna leiklist. Varðandi námið vildu nemendur fá færri en stærri verkefni, fá sms þegar tímar falla niður og minni heimavinnu. Þegar kom að félagslífinu vildu nemendur helst fleiri viðburði á vegum nemendafélagsins, böll og fleiri klúbba.
Fundurinn tókst mjög vel en Hermína Huld Hilmarsdóttir sá um framkvæmd hans. Niðurstöðurnar verða kynntar stjórnendum skólans sem munu vinna með þær áfram.

Vikuna 3.-7. október voru gestir frá Bruntál Tékklandi í heimsókn í Borgarholtsskóla.
Í ferðinni voru nemendur, kennarar og stjórnendur og var tilgangur heimsóknarinnar að kynnast starfi bíladeildarinnar
Gestum var sýndur skólinn, auk þess sem tékknesku nemendurnir tóku þátt í kennslustundum með íslenskum nemendum.

Heilsuvika Borgarholtsskóla fór fram 26.-30. september. Hún tókst mjög vel og var góð þátttaka í viðburðum vikunnar.
Á mánudaginn kom Þorgrímur Þráinsson og ræddi við nemendur og á þriðjudag var Flosi Jón Ófeigsson, leiklistarkennari, með zumba. Jóhanna Karlsdóttir, sem kennir jóga við skólann, var með jógatíma í matsalnum á fimmtudaginn og á föstudag var Silja Úlfarsdóttir með fyrirlestur.  Nemendur og starfsfólk skólans öttu kappi í reipitogi í matsal skólans í hádeginu á miðvikudaginn en þar unnu nemendur viðureignina með þónokkrum yfirburðum. Í <a class="internal secure" href="https://www.bhs.is/skolinn/frettir/byrjun-heilsuviku" target="_blank" rel="noopener">hreyfitímanum á mánudaginn</a> var margvísleg hreyfing í boði fyrir nemendur og var mjög góð þátttaka í öllum námskeiðum.
Mikil ánægja var með heilsuvikuna og er fyrirlesurum og öðrum sem komu að heilsuvikunni þakkað kærlega fyrir þeirra framlag.

Verið velkomin í Borgarholtsskóla

Á næstunni

Umsóknir um jöfnunarstyrk

Laus störf

.

Bleikja, steikt grænmeti, kartöflur og hvítlaukssósa

Grænmetissúpa

Fréttir

Glerbúrið/fiskabúrið vígt

Nýnemavika

Laxness-Jagúarinn

Borgó á Instagram